fughan-e-dard mein bhi dard ki KHalish hi nahin

fuġhān-e-dard meñ bhī dard kī ḳhalish hī nahīñ

diloñ meñ aag lagī hai magar tapish hī nahīñ

kahāñ se laa.eñ vo soz-o-gudāz dil vaale

ki dilbarī kā vo āhañg vo ravish hī nahīñ

haqīqatoñ ke bhī tevar badal to sakte haiñ

hamārī bazm meñ ḳhvāboñ kī vo ḳhalish hī nahīñ

dimāġh kyuuñ na ho sāhil pe sone vāloñ kā

kabhī kabhār jo tūfāñ kī sarzanish hī nahīñ

lubhā.egā use kyā chāñd kā ḳhunuk jaadū

jise nasīb kaḌī dhuup kī tapish hī nahīñ

zamāna qissa-e-dār-o-rasan ko bhuul na jaa.e

kisī ke halqa-e-gesū meñ vo kashish hī nahīñ

ye rañg-o-bū ke tilismāt kis liye haiñ 'surūr'

bahār kyā hai junūñ kī jo parvarish hī nahīñ

fughan-e-dard mein bhi dard ki KHalish hi nahin

dilon mein aag lagi hai magar tapish hi nahin

kahan se laen wo soz-o-gudaz dil wale

ki dilbari ka wo aahang wo rawish hi nahin

haqiqaton ke bhi tewar badal to sakte hain

hamari bazm mein KHwabon ki wo KHalish hi nahin

dimagh kyun na ho sahil pe sone walon ka

kabhi kabhaar jo tufan ki sarzanish hi nahin

lubhaega use kya chand ka KHunuk jadu

jise nasib kaDi dhup ki tapish hi nahin

zamana qissa-e-dar-o-rasan ko bhul na jae

kisi ke halqa-e-gesu mein wo kashish hi nahin

ye rang-o-bu ke tilismat kis liye hain 'surur'

bahaar kya hai junun ki jo parwarish hi nahin