fughan ke sath tere rahat-e-qarar chale

fuġhāñ ke saath tire rāhat-e-qarār chale

navā-garān-e-vafā himmatoñ ko haar chale

ye kyā ki phuul khile aur zaḳhm risne lage

mile sukūñ bhī agar bād-e-nau-bahār chale

ye multafit sī nigāheñ faroġh-e-jām ke saath

chale ye daur chale aur bār-bār chale

hazār barhamī-e-zulf-e-yār bhī dekhī

tujhe to kākul-e-gītī magar sañvār chale

ḳhayāl-o-ilm kā bhī mol-tol hotā hai

hamāre ahd meñ kyā kyā na kārobār chale

hayāt saath chalī kā.enāt saath chalī

ajiib shaan se kuchh log sū-e-dār chale

vahī to the kabhī chashm-o-charāg-e-mahfil-e-ġham

jo be-qarār se uTThe jo ashk-bār chale

thake thake se qadam aur tavīl rāh-e-hayāt

musāfirān-e-adam bojh sā utaar chale

zamīn-e-faiz sitāre luTā rahī hai 'nazar'

ye kyā ki aap yahāñ se bhī sogvār chale

fughan ke sath tere rahat-e-qarar chale

nawa-garan-e-wafa himmaton ko haar chale

ye kya ki phul khile aur zaKHm risne lage

mile sukun bhi agar baad-e-nau-bahaar chale

ye multafit si nigahen farogh-e-jam ke sath

chale ye daur chale aur bar-bar chale

hazar barhami-e-zulf-e-yar bhi dekhi

tujhe to kakul-e-giti magar sanwar chale

KHayal-o-ilm ka bhi mol-tol hota hai

hamare ahd mein kya kya na karobar chale

hayat sath chali kaenat sath chali

ajib shan se kuchh log su-e-dar chale

wahi to the kabhi chashm-o-charag-e-mahfil-e-gham

jo be-qarar se uTThe jo ashk-bar chale

thake thake se qadam aur tawil rah-e-hayat

musafiran-e-adam bojh sa utar chale

zamin-e-faiz sitare luTa rahi hai 'nazar'

ye kya ki aap yahan se bhi sogwar chale