fughan se tark-e-fughan tak hazar tishna-labi hai

fuġhāñ se tark-e-fuġhāñ tak hazār tishna-labī hai

sukūt bhī to ik andāz-e-mudda.ā-talabī hai

bahut dinoñ meñ huā ahl-e-ārzū ko mayassar

vo qurb-e-ḳhās jahāñ terī yaad be-adabī hai

ḳhayāl-e-tark-e-ta.alluq junūn-e-qat-e-marāsim

tamām sa.ī-e-talab hai tamām tishna-labī hai

sukūt-e-sho.ala-e-gul hai ki terā paikar-e-rañgīñ

vo aañch aatī hai jaise badan meñ aag dabī hai

usī ke faiz se āshob-e-āgahī hai gavārā

nigāh-e-nāz hai yā mauj-e-bāda-e-unabī hai

na jaane kis tarah tai hogā tishnagān-e-karam se

vo marhala ki jahāñ arz-e-hāl be-adabī hai

fazā to naġhma-e-gul se bhī chauñk uThī hai lekin

tirī shagufta-labī phir vahī shagufta-labī hai

fughan se tark-e-fughan tak hazar tishna-labi hai

sukut bhi to ek andaz-e-muddaa-talabi hai

bahut dinon mein hua ahl-e-arzu ko mayassar

wo qurb-e-KHas jahan teri yaad be-adabi hai

KHayal-e-tark-e-talluq junun-e-qat-e-marasim

tamam sai-e-talab hai tamam tishna-labi hai

sukut-e-shoala-e-gul hai ki tera paikar-e-rangin

wo aanch aati hai jaise badan mein aag dabi hai

usi ke faiz se aashob-e-agahi hai gawara

nigah-e-naz hai ya mauj-e-baada-e-unabi hai

na jaane kis tarah tai hoga tishnagan-e-karam se

wo marhala ki jahan arz-e-haal be-adabi hai

faza to naghma-e-gul se bhi chaunk uThi hai lekin

teri shagufta-labi phir wahi shagufta-labi hai