furaat-e-dahr se aage sarab dekh zara

furāt-e-dahr se aage sarāb dekh zarā

hisāb maañg rahe haiñ janāb dekh zarā

jahāñ-jahāñ bhī bahāroñ pe tere pahre haiñ

vahāñ-vahāñ pe khileñge gulāb dekh zarā

miTe miTe ye mazāmīñ muḌe muḌe aurāq

khulī hai 'umr-e-ravāñ kī kitāb dekh zarā

kisī ke naam huī ibtidā kisī pe tamām

hayāt saarī huī intisāb dekh zarā

siyāh raat ke dāman se jhāñktā kābūs

mujhe pukār ke kahtā hai ḳhvāb dekh zarā

kise qubūl nahīñ shahr-e-ārzū kā fareb

magar dayār-e-tamanna ke baab dekh zarā

nirā fareb hai nairangī-e-ḳhayāl kī rau

hubāb dekh zarā iztirāb dekh zarā

ki sar-burīda haiñ 'hammād' munkir-e-bai'at

ye ahd-nāma-e-'izzat-ma.āb dekh zarā

furaat-e-dahr se aage sarab dekh zara

hisab mang rahe hain janab dekh zara

jahan-jahan bhi bahaaron pe tere pahre hain

wahan-wahan pe khilenge gulab dekh zara

miTe miTe ye mazamin muDe muDe auraq

khuli hai 'umr-e-rawan ki kitab dekh zara

kisi ke nam hui ibtida kisi pe tamam

hayat sari hui intisab dekh zara

siyah raat ke daman se jhankta kabus

mujhe pukar ke kahta hai KHwab dekh zara

kise qubul nahin shahr-e-arzu ka fareb

magar dayar-e-tamanna ke bab dekh zara

nira fareb hai nairangi-e-KHayal ki rau

hubab dekh zara iztirab dekh zara

ki sar-burida hain 'hammad' munkir-e-bai'at

ye ahd-nama-e-'izzat-maab dekh zara