furqat-e-bazm-e-yar ka dil mein zaKHm abhi tak taza hai

furqat-e-bazm-e-yār kā dil meñ zaḳhm abhī tak taaza hai

kaun sā thā vo jurm-e-mohabbat jis kā ye ḳhamyāza hai

jhūTī qasmeñ kyoñ khāte ho kyoñ īmān gañvāte ho

kitnā ham se pyaar hai tum ko is kā hameñ andāza hai

har chehre par ik chehra hai kis ko ham ā.īna dikhlā.eñ

makr-o-fareb-o-kizb-o-riyā kā har ik ruḳh par ġhāza hai

is nagrī meñ basne vaale aur bhī āḳhir baste haiñ

ham par hī kyoñ ḳhaas ināyat ham par hī āvāza hai

jaate jaate muḌ kar us ne ek nazar to dekhā thā

muddat guzrī un lamhoñ kī yaad abhī tak taaza hai

is se fuzūñ-tar 'vāsil' apnī mahrūmī ab kyā hogī

jis se ham ko aas bahut thī band vahī darvāza hai

furqat-e-bazm-e-yar ka dil mein zaKHm abhi tak taza hai

kaun sa tha wo jurm-e-mohabbat jis ka ye KHamyaza hai

jhuTi qasmen kyon khate ho kyon iman ganwate ho

kitna hum se pyar hai tum ko is ka hamein andaza hai

har chehre par ek chehra hai kis ko hum aaina dikhlaen

makr-o-fareb-o-kizb-o-riya ka har ek ruKH par ghaza hai

is nagri mein basne wale aur bhi aaKHir baste hain

hum par hi kyon KHas inayat hum par hi aawaza hai

jate jate muD kar us ne ek nazar to dekha tha

muddat guzri un lamhon ki yaad abhi tak taza hai

is se fuzun-tar 'wasil' apni mahrumi ab kya hogi

jis se hum ko aas bahut thi band wahi darwaza hai