فرقت بزم یار کا دل میں زخم ابھی تک تازہ ہے

فرقت بزم یار کا دل میں زخم ابھی تک تازہ ہے

کون سا تھا وہ جرم محبت جس کا یہ خمیازہ ہے

جھوٹی قسمیں کیوں کھاتے ہو کیوں ایمان گنواتے ہو

کتنا ہم سے پیار ہے تم کو اس کا ہمیں اندازہ ہے

ہر چہرے پر اک چہرہ ہے کس کو ہم آئینہ دکھلائیں

مکر و فریب و کذب و ریا کا ہر اک رخ پر غازہ ہے

اس نگری میں بسنے والے اور بھی آخر بستے ہیں

ہم پر ہی کیوں خاص عنایت ہم پر ہی آوازہ ہے

جاتے جاتے مڑ کر اس نے ایک نظر تو دیکھا تھا

مدت گزری ان لمحوں کی یاد ابھی تک تازہ ہے

اس سے فزوں تر واصلؔ اپنی محرومی اب کیا ہوگی

جس سے ہم کو آس بہت تھی بند وہی دروازہ ہے