فسون رنگ تجلئ خواب زار نہ دے

فسون رنگ تجلئ خواب زار نہ دے

نگاہ دے بھی تو منت کش سہار نہ دے

کچھ اور ذوق تجسس کو مرتعش کر دے

سکوں نظر کو نہ دے قلب کو قرار نہ دے

توہمات کے صحرا سے پھر گزار مجھے

یقیں کا سوز نہ دے حرف اعتبار نہ دے

نہ دے وہ زور کے ایمان ظلم پر رکھوں

شعار جبر کو سمجھوں وہ اختیار نہ دے

میں قرض خوار اگر ہوں تو پھر تقاضہ نہ کر

تو سود خوار ہے تو زندگی ادھار نہ دے

چھپا چھپا کے نہ رکھ حرف حرف میں خود کو

جنوں شعار نظر پیرہن اتار نہ دے