gahe gahe jo idhar aap karam karte hain

gaahe gaahe jo idhar aap karam karte haiñ

vo haiñ uTh jaate haiñ ye aur sitam karte haiñ

jī na lag jaa.e kahīñ tujh se isī vāste bas

rafta rafta tire ham milne ko kam karte haiñ

vāqa.ī yuuñ to zarā dekhiyo sub.hān-allāh

tere dikhlāne ko ham chashm ye nam karte haiñ

ishq meñ sharm kahāñ nāseh-e-mushfiq ye bajā

aap ko kyā hai jo is baat kā ġham karte haiñ

gāliyāñ khāne ko us shoḳh se milte haiñ haañ

koī kartā nahīñ jo kaam so ham karte haiñ

haiñ talabgār mohabbat ke miyāñ jo ashḳhās

vo bhalā kab talab-e-dām-o-diram karte haiñ

ain mastī meñ hameñ dīd-e-fanā hai 'inshā'

aañkh jab mūñdte haiñ sair-e-adam karte haiñ

gahe gahe jo idhar aap karam karte hain

wo hain uTh jate hain ye aur sitam karte hain

ji na lag jae kahin tujh se isi waste bas

rafta rafta tere hum milne ko kam karte hain

waqai yun to zara dekhiyo subhan-allah

tere dikhlane ko hum chashm ye nam karte hain

ishq mein sharm kahan naseh-e-mushfiq ye baja

aap ko kya hai jo is baat ka gham karte hain

galiyan khane ko us shoKH se milte hain han

koi karta nahin jo kaam so hum karte hain

hain talabgar mohabbat ke miyan jo ashKHas

wo bhala kab talab-e-dam-o-diram karte hain

ain masti mein hamein did-e-fana hai 'insha'

aankh jab mundte hain sair-e-adam karte hain