ganw wale kahan badalte hain

gaañv vaale kahāñ badalte haiñ

aao ham hī jahāñ badalte haiñ

ek ham se gurez kī ḳhātir

kitne vo āshiyāñ badalte haiñ

vo aqīdat ke rañg kyā jāneñ

roz jo āstāñ badalte haiñ

aql vāloñ ne haar kar ye kahā

ishq vaale kahāñ badalte haiñ

ham ko urdu hai jaan se pyārī

ham nahīñ vo jo jaañ badalte haiñ

kyoñ nahīñ aatī haiñ abābīleñ

aao tarz-e-fuġhāñ badalte haiñ

rut jo badlī to maiñ ne ye jaanā

kyoñ parinde makāñ badalte haiñ

vaqt paḌne pe jaanā hai 'aiman'

kis tarah mehrbāñ badalte haiñ

ganw wale kahan badalte hain

aao hum hi jahan badalte hain

ek hum se gurez ki KHatir

kitne wo aashiyan badalte hain

wo aqidat ke rang kya jaanen

roz jo aastan badalte hain

aql walon ne haar kar ye kaha

ishq wale kahan badalte hain

hum ko urdu hai jaan se pyari

hum nahin wo jo jaan badalte hain

kyon nahin aati hain ababilen

aao tarz-e-fughan badalte hain

rut jo badli to main ne ye jaana

kyon parinde makan badalte hain

waqt paDne pe jaana hai 'aiman'

kis tarah mehrban badalte hain