gae baras ki yahi baat yaadgar rahi

ga.e baras kī yahī baat yādgār rahī

fazā ġhamoñ ke liye ḳhuub sāzgār rahī

agarche faisla har baar apne haq meñ huā

sazā-e-jurm bahar-hāl barqarār rahī

badaltī dekhīñ vafādāriyāñ bhī vaqt ke saath

vafā jahāñ ke liye ek kārobār rahī

ab apnī zaat se bhī e'timād un kā uThā

vo jin kī baat kabhī harf-e-e'tibār rahī

ḳhabar thī go use ab mojaze nahīñ hote

hayāt phir bhī magar mahv-e-intizār rahī

na koī harf-e-malāmat na koī kalma-e-ḳhair

ye ziist ab na kisī kī bhī zer-e-bār rahī

ye aur baat ki dil ġham meñ ḳhud kafīl huā

magar vo aañkh mire ġham meñ ashk-bār rahī

gae baras ki yahi baat yaadgar rahi

faza ghamon ke liye KHub sazgar rahi

agarche faisla har bar apne haq mein hua

saza-e-jurm bahar-haal barqarar rahi

badalti dekhin wafadariyan bhi waqt ke sath

wafa jahan ke liye ek karobar rahi

ab apni zat se bhi e'timad un ka uTha

wo jin ki baat kabhi harf-e-e'tibar rahi

KHabar thi go use ab mojaze nahin hote

hayat phir bhi magar mahw-e-intizar rahi

na koi harf-e-malamat na koi kalma-e-KHair

ye zist ab na kisi ki bhi zer-e-bar rahi

ye aur baat ki dil gham mein KHud kafil hua

magar wo aankh mere gham mein ashk-bar rahi