gae guzre dinon ki yaad ka nashsha abhi tak hai

ga.e guzre dinoñ kī yaad kā nashsha abhī tak hai

mere paimāna-e-dil meñ koī sahbā abhī tak hai

chhalak paḌte haiñ aañsū aañkh se ik moḌ muḌte hī

purāne ghar kī galiyoñ se mirā rishta abhī tak hai

ai kū-e-yār tū shāyad use ab bhuul baiThī ho

magar tere sabab se shaḳhs ik rusvā abhī tak hai

tasavvur hī kī duniyā thī ḳhayāloñ hī meñ rahte the

yaqīñ se kam nahīñ thā jo vahī dhoka abhī tak hai

inhī āñkhoñ se guzrā hai vo har manzar jo kahtī haiñ

sarāsar vahm thā vo sab ke jo dekhā abhī tak hai

ye ghar us shaḳhs kī mehnat ko ab tak ḳharch kartā hai

jo sāloñ pahle mar kar bhī kahīñ zinda abhī tak hai

masā.il kuchh bhī hoñ lekin mujhe kab fikr thī koī

the vo bhī din maiñ kahtā thā mirā abbā abhī tak hai

mohabbat kī bhalā is se baḌī tasdīq kyā hogī

musalmānoñ kī bastī meñ jo mandir thā abhī tak hai

burā kahtī hai gar duniyā hameñ to mas.ala kyā hai

hameñ to fikr hai us kī ki jo achchhā abhī tak hai

hujūm-e-dostāñ har sū hai lekin bāvajūd is ke

'amar' kyā baat hai āḳhir jo tū tanhā abhī tak hai

gae guzre dinon ki yaad ka nashsha abhi tak hai

mere paimana-e-dil mein koi sahba abhi tak hai

chhalak paDte hain aansu aankh se ek moD muDte hi

purane ghar ki galiyon se mera rishta abhi tak hai

ai ku-e-yar tu shayad use ab bhul baiThi ho

magar tere sabab se shaKHs ek ruswa abhi tak hai

tasawwur hi ki duniya thi KHayalon hi mein rahte the

yaqin se kam nahin tha jo wahi dhoka abhi tak hai

inhi aankhon se guzra hai wo har manzar jo kahti hain

sarasar wahm tha wo sab ke jo dekha abhi tak hai

ye ghar us shaKHs ki mehnat ko ab tak KHarch karta hai

jo salon pahle mar kar bhi kahin zinda abhi tak hai

masail kuchh bhi hon lekin mujhe kab fikr thi koi

the wo bhi din main kahta tha mera abba abhi tak hai

mohabbat ki bhala is se baDi tasdiq kya hogi

musalmanon ki basti mein jo mandir tha abhi tak hai

bura kahti hai gar duniya hamein to masala kya hai

hamein to fikr hai us ki ki jo achchha abhi tak hai

hujum-e-dostan har su hai lekin bawajud is ke

'amar' kya baat hai aaKHir jo tu tanha abhi tak hai