gae hain jab se wo uTh ke yan se hai haal bahar mera bayan se

ga.e haiñ jab se vo uTh ke yaañ se hai haal bāhar mirā bayāñ se

kahe koī itnā jān-e-jāñ se milo nahīñ to gayā meñ jaañ se

jo kuchh guzartā hai mere dil par sunā.ūñ kis ko vo haa.e dilbar

ḳhudā kare phir vo din mayassar kahūñ maiñ apnī hī sab zabāñ se

kabhī ḳhafā ho ke baat karnā kabhī vo kah kah ke phir mukarnā

phir ulTā bohtān mujh pe dharnā ye tarz tum ne liyā kahāñ se

kabhī tire ġham meñ mujh ko ronā kabhī phir aaphī hai chupke honā

jo yaad aatā hai saath sonā to raat kaTtī hai kis fuġhāñ se

ghaḌī ghaḌī hijr kī hai bahārī dikhā.e sūrat ḳhudā tumhārī

sunūñ vo bāteñ piyārī piyārī ajab adā se ajab bayāñ se

tirā ḳhafā ho ke ruuTh jaanā vo minnatoñ se mirā manānā

vo apnī apnī sī kuchh sunānā vo bāteñ bhī aap dil-sitāñ se

ajab hī dushman se dostī kī ki shakl ab hai ye zindagī kī

laboñ pe chakkī hai jāñ-kanī kī paḌe haiñ behosh nīm-jāñ se

kahā kuchh us ne yahāñ kisī se ye baat qāsid nahīñ hañsī se

gumān hotā hai aur hī se tire ulajhte hue bayāñ se

'nizām' kyuuñ tū ne us ko chāhā ye dil meñ kyā thī jo dil lagāyā

jo deve taufīq kuchh bhī maulā to ab na milnā kabhī butāñ se

gae hain jab se wo uTh ke yan se hai haal bahar mera bayan se

kahe koi itna jaan-e-jaan se milo nahin to gaya mein jaan se

jo kuchh guzarta hai mere dil par sunaun kis ko wo hae dilbar

KHuda kare phir wo din mayassar kahun main apni hi sab zaban se

kabhi KHafa ho ke baat karna kabhi wo kah kah ke phir mukarna

phir ulTa bohtan mujh pe dharna ye tarz tum ne liya kahan se

kabhi tere gham mein mujh ko rona kabhi phir aaphi hai chupke hona

jo yaad aata hai sath sona to raat kaTti hai kis fughan se

ghaDi ghaDi hijr ki hai bahaari dikhae surat KHuda tumhaari

sunun wo baaten piyari piyari ajab ada se ajab bayan se

tera KHafa ho ke ruTh jaana wo minnaton se mera manana

wo apni apni si kuchh sunana wo baaten bhi aap dil-sitan se

ajab hi dushman se dosti ki ki shakl ab hai ye zindagi ki

labon pe chakki hai jaan-kani ki paDe hain behosh nim-jaan se

kaha kuchh us ne yahan kisi se ye baat qasid nahin hansi se

guman hota hai aur hi se tere ulajhte hue bayan se

'nizam' kyun tu ne us ko chaha ye dil mein kya thi jo dil lagaya

jo dewe taufiq kuchh bhi maula to ab na milna kabhi butan se