gah mashq-e-sitam gah-e-karam yaad karenge

gah mashq-e-sitam gāh-e-karam yaad kareñge

jab tak bhī jiyeñge tumheñ ham yaad kareñge

jab zikr chhiḌegā kahīñ arbāb-e-vafā kā

apne dil-e-marhūm ko ham yaad kareñge

dil apnā hai dil par to nahīñ zor kisī kā

ka.abe meñ bhī ham tujh ko sanam yaad kareñge

jo sajda-gah-e-ishq kī rif.at se haiñ vāqif

vo log mirā naqsh-e-qadam yaad kareñge

tauqīr baḌhā.ī hai mire sajdoñ ne un kī

ik umr mujhe dair-o-haram yaad kareñge

jab baat chhiḌegī kahīñ arbāb-e-nazar kī

'sāqī' ko bahut ahl-e-qalam yaad kareñge

gah mashq-e-sitam gah-e-karam yaad karenge

jab tak bhi jiyenge tumhein hum yaad karenge

jab zikr chhiDega kahin arbab-e-wafa ka

apne dil-e-marhum ko hum yaad karenge

dil apna hai dil par to nahin zor kisi ka

kabe mein bhi hum tujh ko sanam yaad karenge

jo sajda-gah-e-ishq ki rifat se hain waqif

wo log mera naqsh-e-qadam yaad karenge

tauqir baDhai hai mere sajdon ne un ki

ek umr mujhe dair-o-haram yaad karenge

jab baat chhiDegi kahin arbab-e-nazar ki

'saqi' ko bahut ahl-e-qalam yaad karenge