gahre suron mein arz-e-nawa-e-hayat kar

gahre suroñ meñ arz-e-navā-e-hayāt kar

siine pe ek dard kī sil rakh ke baat kar

ye dūriyoñ kā sail-e-ravāñ barg-e-nāma bhej

ye fāsloñ ke bañd-e-girāñ koī baat kar

terā dayār raat mirī bāñsurī kī lai

is ḳhvāb-e-dil-nashīñ ko mirī kā.enāt kar

mere ġhamoñ ko apne ḳhayāloñ meñ baar de

in uljhanoñ ko silsila-e-vāqi.āt kar

aa ek din mire dil-e-vīrāñ meñ baiTh kar

is dasht ke sukūt-e-suḳhan-jū se baat kar

'amjad' nashāt-e-zīst isī kashmakash meñ hai

marne kā qasd jiine kā azm ek saat kar

gahre suron mein arz-e-nawa-e-hayat kar

sine pe ek dard ki sil rakh ke baat kar

ye duriyon ka sail-e-rawan barg-e-nama bhej

ye faslon ke band-e-giran koi baat kar

tera dayar raat meri bansuri ki lai

is KHwab-e-dil-nashin ko meri kaenat kar

mere ghamon ko apne KHayalon mein bar de

in uljhanon ko silsila-e-waqiat kar

aa ek din mere dil-e-viran mein baiTh kar

is dasht ke sukut-e-suKHan-ju se baat kar

'amjad' nashat-e-zist isi kashmakash mein hai

marne ka qasd jine ka azm ek sat kar