گہری کالی آنکھوں والی دین کسی اوتار کی ہے

گہری کالی آنکھوں والی دین کسی اوتار کی ہے

شہر نہیں معلوم مجھے پر لڑکی پھوٹوہار کی ہے

رسموں ریتوں دیواروں کو توڑا بھی جا سکتا تھا

مل بھی سکتے تھے ہم لیکن بات وہی دستار کی ہے

تتلی جیسی رنگ برنگی اڑتی ہے اک آنگن میں

اتنی نازک ہے وہ جیسے کچی کلی کچنار کی ہے

اردو ایسے بولتی ہے وہ جیسے دہلی والی ہو

شعر سناتی ہے غالبؔ کے دیوانی گلزارؔ کی ہے

اس کی پائل کی چھن چھن پر رقص پرندے کرتے ہیں

برکھا رت کے موسم میں وہ گونج کسی ملہار کی ہے

آج بھی میری بستی میں کچھ کوفے والے رہتے ہیں

جلنے والا گھر تھا میرا آگ مگر اغیار کی ہے