gahri suni rah aur tanha sa main

gahrī suunī raah aur tanhā sā maiñ

raat apnī chaap se Dartā sā maiñ

tū ki merā aa.ina hotā huā

aur tere aks meñ Dhaltā sā maiñ

kab tire kūche se kar jaanā hai kuuch

is tasavvur se hī ghabrātā sā maiñ

merī rāhoñ ke liye manzil tū hī

tere qadmoñ ke liye rastā sā maiñ

āsmāñ meñ rañg bikhrātā sā tū

aur sarāpā diid ban jaatā sā maiñ

hasrat-e-ta.abīr se chhūTūñ kabhī

har nafas is ḳhvāb meñ jaltā sā maiñ

be-karāñ hotā huā dasht-e-gumāñ

aur yaqīñ ke daar par aayā sā maiñ

nā koī manzar na ab koī ḳhayāl

ab har ik shai bhūltā jaatā sā maiñ

gahri suni rah aur tanha sa main

raat apni chap se Darta sa main

tu ki mera aaina hota hua

aur tere aks mein Dhalta sa main

kab tere kuche se kar jaana hai kuch

is tasawwur se hi ghabraata sa main

meri rahon ke liye manzil tu hi

tere qadmon ke liye rasta sa main

aasman mein rang bikhraata sa tu

aur sarapa did ban jata sa main

hasrat-e-tabir se chhuTun kabhi

har nafas is KHwab mein jalta sa main

be-karan hota hua dasht-e-guman

aur yaqin ke dar par aaya sa main

na koi manzar na ab koi KHayal

ab har ek shai bhulta jata sa main