gai nahin tere zulm-o-sitam ki KHu ab tak

ga.ī nahīñ tire zulm-o-sitam kī ḳhū ab tak

Tapak rahā hai mirī aañkh se lahū ab tak

na jaane kab se hai mere laboñ pe terā naam

isī sabab se to TuuTā nahīñ vuzū ab tak

tamām umr gulistāñ meñ kaT ga.ī lekin

huā nahīñ mujhe aur ek rañg-o-bū ab tak

kisī bhī sher ko hāsil huī na zarḳhezī

maiñ DhūñDhtā rahā sahrāoñ meñ numū ab tak

khulī sarā.e ke jaisā hai ye badan apnā

aur is sarā.e meñ chaltī rahī hai lū ab tak

tasavvurāt ke ḳhemoñ ko raushnī mil jaa.e

isī ḳhayāl kī hai dil meñ aarzū ab tak

kiye the 'shauq' jo mere javān beTe ne

vo dil ke chaak hue hī nahīñ rafū ab tak

gai nahin tere zulm-o-sitam ki KHu ab tak

Tapak raha hai meri aankh se lahu ab tak

na jaane kab se hai mere labon pe tera nam

isi sabab se to TuTa nahin wuzu ab tak

tamam umr gulistan mein kaT gai lekin

hua nahin mujhe aur ek rang-o-bu ab tak

kisi bhi sher ko hasil hui na zarKHezi

main DhunDhta raha sahraon mein numu ab tak

khuli sarae ke jaisa hai ye badan apna

aur is sarae mein chalti rahi hai lu ab tak

tasawwuraat ke KHemon ko raushni mil jae

isi KHayal ki hai dil mein aarzu ab tak

kiye the 'shauq' jo mere jawan beTe ne

wo dil ke chaak hue hi nahin rafu ab tak