gai ruton ke phir aane ki dil mein aas na rakh

ga.ī rutoñ ke phir aane kī dil meñ aas na rakh

guzishta lamhoñ kī tasvīreñ apne paas na rakh

jo shahr-e-sang meñ jiinā hai sang-dil ban jā

tū apne siine meñ ab qalb-e-ġham-shanās na rakh

zarā sā shak bhī mohabbat meñ kufr hotā hai

yaqīñ kī had meñ tū gunjā.ish-e-qayās na rakh

ye chand pal kī ḳhushī ġham kā pesh-ḳhema hai

tabassumāt pe taskīn kī asaas na rakh

kar apne aap meñ paidā tahakkumāna rang

ab apne lahje meñ pahlū-e-iltimās na rakh

bahār-e-nau tire dāman meñ ātish-e-gul hai

barahna shāḳhoñ pe phūloñ kā ab libās na rakh

ye aate jaate ḳhayāloñ se uns kyā mā'nī

ki apne hoñToñ pe ab reza-reza pyaas na rakh

yahī charāġh to hai merī raat kā sūraj

ise ḳhudā ke liye āñdhiy.oñ ke paas na rakh

gai ruton ke phir aane ki dil mein aas na rakh

guzishta lamhon ki taswiren apne pas na rakh

jo shahr-e-sang mein jina hai sang-dil ban ja

tu apne sine mein ab qalb-e-gham-shanas na rakh

zara sa shak bhi mohabbat mein kufr hota hai

yaqin ki had mein tu gunjaish-e-qayas na rakh

ye chand pal ki KHushi gham ka pesh-KHema hai

tabassumat pe taskin ki asas na rakh

kar apne aap mein paida tahakkumana rang

ab apne lahje mein pahlu-e-iltimas na rakh

bahaar-e-nau tere daman mein aatish-e-gul hai

barahna shaKHon pe phulon ka ab libas na rakh

ye aate jate KHayalon se uns kya ma'ni

ki apne honTon pe ab reza-reza pyas na rakh

yahi charagh to hai meri raat ka suraj

ise KHuda ke liye aandhiyon ke pas na rakh