ghair hanste hain faqat is liye Tal jata hun

ġhair hañste haiñ faqat is liye Tal jaatā huuñ

maiñ bayābānoñ meñ rone ko nikal jaatā huuñ

josh vahshat kā huā mausam-e-gul aa pahuñchā

kuchh dinoñ hosh meñ rahtā huuñ sambhal jaatā huuñ

apnī ruḳhsat hai butoñ se bhī ab inshā-allāh

dair se sū-e-haram aaj hī kal jaatā huuñ

kūcha-e-qātil-e-be-rahm jise kahte haiñ

maiñ vahāñ dauḌ ke mushtāq-e-ajal jaatā huuñ

jab nikalne nahīñ dete haiñ mujhe zindāñ se

apne aape se maiñ nā-chār nikal jaatā huuñ

ġhair albatta tire paañv meñ malte haiñ hinā

maiñ to aa kar kaf-e-afsos hī mal jaatā huuñ

maiñ jo rotā huuñ to kahtā hai na kar bad-shagunī

baat kahtā hai vo aisī ki dahal jaatā huuñ

dost hotā hai to hotā hai vo dushman ai 'mehr'

vo badal jaatā hai yā kuchh maiñ badal jaatā huuñ

ghair hanste hain faqat is liye Tal jata hun

main bayabanon mein rone ko nikal jata hun

josh wahshat ka hua mausam-e-gul aa pahuncha

kuchh dinon hosh mein rahta hun sambhal jata hun

apni ruKHsat hai buton se bhi ab insha-allah

dair se su-e-haram aaj hi kal jata hun

kucha-e-qatil-e-be-rahm jise kahte hain

main wahan dauD ke mushtaq-e-ajal jata hun

jab nikalne nahin dete hain mujhe zindan se

apne aape se main na-chaar nikal jata hun

ghair albatta tere panw mein malte hain hina

main to aa kar kaf-e-afsos hi mal jata hun

main jo rota hun to kahta hai na kar bad-shaguni

baat kahta hai wo aisi ki dahal jata hun

dost hota hai to hota hai wo dushman ai 'mehr'

wo badal jata hai ya kuchh main badal jata hun