ghair kya jaane tujhko kya samjhe

ġhair kyā jaane tujh ko kyā samjhe

ham to apnā tujhe ḳhudā samjhe

vo muāfiq ho yā muḳhālif ho

dāman-e-dost kī havā samjhe

kis ke vo dar pe jaa.e kyoñ jaa.e

jo tujhe apnā aasrā samjhe

tere mahbūb ke marātib ko

ambiyā samjhe auliyā samjhe

har sitam ko tire karam jaanā

har jafā ko tirī adā samjhe

koī kis tarah is zamāne meñ

kis ko achchhā kise burā samjhe

tū bhalā.ī pe rakh nazar 'zamzam'

laakh tujh ko koī burā samjhe

ghair kya jaane tujh ko kya samjhe

hum to apna tujhe KHuda samjhe

wo muafiq ho ya muKHalif ho

daman-e-dost ki hawa samjhe

kis ke wo dar pe jae kyon jae

jo tujhe apna aasra samjhe

tere mahbub ke maraatib ko

ambiya samjhe auliya samjhe

har sitam ko tere karam jaana

har jafa ko teri ada samjhe

koi kis tarah is zamane mein

kis ko achchha kise bura samjhe

tu bhalai pe rakh nazar 'zamzam'

lakh tujh ko koi bura samjhe