ghair-mumkin tha ye ek kaam magar humne kiya

ġhair-mumkin thā ye ik kaam magar ham ne kiyā

tere nazzāre ko pāband-e-nazar ham ne kiyā

aage chal kar ye ḳhudā jaane kahāñ rah jaa.eñ

ġhair bhī chal paḌe jab azm-e-safar ham ne kiyā

in ḳhayālāt hī par TuuT paḌī hai duniyā

jin ḳhayālāt ko kal zehn-badar ham ne kiyā

din ḳhatarnāk jazīra sā nazar aane lagā

apnī hī zaat kā kal shab jo safar ham ne kiyā

yuuñ taḌap uTThā ki aa.ī ho qayāmat jaise

us kī dahlīz pe ḳham aaj jo sar ham ne kiyā

tū hai hamrāh to kāñTe bhī maza dene lage

yuuñ to kahne ko ka.ī baar safar ham ne kiyā

kar ga.e bhuul ke jo 'sarmad'-o-'mansūr'-o-'vaqār'

vo tamāsha na sar-e-rāh-guzar ham ne kiyā

ghair-mumkin tha ye ek kaam magar hum ne kiya

tere nazzare ko paband-e-nazar hum ne kiya

aage chal kar ye KHuda jaane kahan rah jaen

ghair bhi chal paDe jab azm-e-safar hum ne kiya

in KHayalat hi par TuT paDi hai duniya

jin KHayalat ko kal zehn-badar hum ne kiya

din KHatarnak jazira sa nazar aane laga

apni hi zat ka kal shab jo safar hum ne kiya

yun taDap uTTha ki aai ho qayamat jaise

us ki dahliz pe KHam aaj jo sar hum ne kiya

tu hai hamrah to kanTe bhi maza dene lage

yun to kahne ko kai bar safar hum ne kiya

kar gae bhul ke jo 'sarmad'-o-'mansur'-o-'waqar'

wo tamasha na sar-e-rah-guzar hum ne kiya