ghair se rasm-o-rah kyon maine suna diya ki yun

ġhair se rasm-o-rāh kyoñ maiñ ne sunā diyā ki yuuñ

us ne pakaḌ ke haath se mujh ko uThā diyā ki yuuñ

mujh ko nikammā kah diyā maiñ ne kahā bhalā ye kyoñ

aa.ina le ke haath meñ us ne dikhā diyā ki yuuñ

murda diloñ meñ zindagī aatī hai kaise aud kar

ruḳh se naqāb-e-zulf ko us ne haTā diyā ki yuuñ

pyaar se pesh aa ke jo vaj.h-e-malāl pūchh lī

mahshar-e-shor se jahāñ sar par uThā diyā ki yuuñ

dil ko lagī hai Thes gar mujh ko batā de mājrā

qatra-e-ashk aañkh se us ne girā diyā ki yuuñ

pūchhā hamārā hāl-e-dil jis ne 'irāqī' pyaar se

apnā kalām ek baar paḌh ke sunā diyā ki yuuñ

ghair se rasm-o-rah kyon main ne suna diya ki yun

us ne pakaD ke hath se mujh ko uTha diya ki yun

mujh ko nikamma kah diya main ne kaha bhala ye kyon

aaina le ke hath mein us ne dikha diya ki yun

murda dilon mein zindagi aati hai kaise aud kar

ruKH se naqab-e-zulf ko us ne haTa diya ki yun

pyar se pesh aa ke jo wajh-e-malal puchh li

mahshar-e-shor se jahan sar par uTha diya ki yun

dil ko lagi hai Thes gar mujh ko bata de majra

qatra-e-ashk aankh se us ne gira diya ki yun

puchha hamara haal-e-dil jis ne 'iraqi' pyar se

apna kalam ek bar paDh ke suna diya ki yun