ghairon ka to kahna kya mahram se nahin kahta

ġhairoñ kā to kahnā kyā mahram se nahīñ kahtā

maiñ ālam-e-ġham apnā 'ālam se nahīñ kahtā

paḌh letī haiñ kaifiyyat kuchh taḌpī huī nazreñ

dukh apne maiñ har chashm-e-pur-nam se nahīñ kahtā

rahgīr huuñ maiñ aisā har ġham se guzartā hai

dā'vat pe jo rindān-e-ḳhurram se nahīñ kahtā

mausam hama-gardish hai pasmānda-e-gardish hai

lab-tishna koī ye shai kyuuñ jam se nahīñ kahtā

kasb-e-mut.harrik se pā-basta nasab tuġhre

ye kyā hai koī ahl-e-ḳhātam se nahīñ kahtā

aa dāġh-e-mohabbat ke sāñche meñ tujhe Dhālūñ

ḳhātam se maiñ kahtā huuñ dirham se nahīñ kahtā

kuchh baat thī kahne kī kuchh bhuul gayā ab maiñ

fitrat se nahīñ kahtā aadam se nahīñ kahtā

kahte to nahīñ bāvar nā kahiye to kāfir-tar

kahne kī qasam mujh ko maiñ dam se nahīñ kahtā

kahlāne meñ ḳhud un kā kuchh takmila nāras hai

ulTe unhīñ shikve haiñ kyuuñ ham se nahīñ kahtā

haañ merī ye uljhan to har dil meñ khaTaktī hai

kuchh muḌ ke koī zulf-e-barham se nahīñ kahtā

kyuuñ ho na junūñ kam-go jab hotā hai ye zīrak

dohrā.ī huī bāteñ mahram se nahīñ kahtā

kahne se huā gahrā kuchh aur ġham-e-pinhāñ

maiñ saa.e se kahtā huuñ hamdam se nahīñ kahtā

jis lamhe se dekhā hai ik she'r sarāpā ko

dānista koī misra' is dam se nahīñ kahtā

dete haiñ vo mahfil meñ yuuñ daad 'latīfī' ko

ash’ār ye kyā aksar mub.ham se nahīñ kahtā

ghairon ka to kahna kya mahram se nahin kahta

main aalam-e-gham apna 'alam se nahin kahta

paDh leti hain kaifiyyat kuchh taDpi hui nazren

dukh apne main har chashm-e-pur-nam se nahin kahta

rahgir hun main aisa har gham se guzarta hai

da'wat pe jo rindan-e-KHurram se nahin kahta

mausam hama-gardish hai pasmanda-e-gardish hai

lab-tishna koi ye shai kyun jam se nahin kahta

kasb-e-mutharrik se pa-basta nasab tughre

ye kya hai koi ahl-e-KHatam se nahin kahta

aa dagh-e-mohabbat ke sanche mein tujhe Dhaalun

KHatam se main kahta hun dirham se nahin kahta

kuchh baat thi kahne ki kuchh bhul gaya ab main

fitrat se nahin kahta aadam se nahin kahta

kahte to nahin bawar na kahiye to kafir-tar

kahne ki qasam mujh ko main dam se nahin kahta

kahlane mein KHud un ka kuchh takmila naras hai

ulTe unhin shikwe hain kyun hum se nahin kahta

han meri ye uljhan to har dil mein khaTakti hai

kuchh muD ke koi zulf-e-barham se nahin kahta

kyun ho na junun kam-go jab hota hai ye zirak

dohrai hui baaten mahram se nahin kahta

kahne se hua gahra kuchh aur gham-e-pinhan

main sae se kahta hun hamdam se nahin kahta

jis lamhe se dekha hai ek she'r sarapa ko

danista koi misra' is dam se nahin kahta

dete hain wo mahfil mein yun dad 'latifi' ko

ash’ar ye kya aksar mubham se nahin kahta