ghairon ko ata aur jafa mere liye hai

ġhairoñ ko atā aur jafā mere liye hai

ḳhush huuñ ki mohabbat kī sazā mere liye hai

ḳhush ho ke abhī taisha-e-farhād uThā le

ai ishq ye qudrat kī atā mere liye hai

tum jo bhī karo mālik-o-muḳhtār ho sāhab

pābandī-e-paimān-e-vafā mere liye hai

khul pā.egā kab uqda-e-rāz-e-dil-e-bulbul

rahne do use kaam mirā mere liye hai

jā.eñge kahāñ chhoḌ ke ye ziist ke sāmāñ

ye baaġh ye jannat kī havā mere liye hai

kuchh rabt nahīñ ġhair kā un se ġham-e-daurāñ

ye barq ye tūfān-e-balā mere liye hai

kyuuñ 'nūr' jhukāte kahīñ apnā sar-e-aqdas

dar terā jo sajde ko banā mere liye hai

ghairon ko ata aur jafa mere liye hai

KHush hun ki mohabbat ki saza mere liye hai

KHush ho ke abhi taisha-e-farhad uTha le

ai ishq ye qudrat ki ata mere liye hai

tum jo bhi karo malik-o-muKHtar ho sahab

pabandi-e-paiman-e-wafa mere liye hai

khul paega kab uqda-e-raaz-e-dil-e-bulbul

rahne do use kaam mera mere liye hai

jaenge kahan chhoD ke ye zist ke saman

ye bagh ye jannat ki hawa mere liye hai

kuchh rabt nahin ghair ka un se gham-e-dauran

ye barq ye tufan-e-bala mere liye hai

kyun 'nur' jhukate kahin apna sar-e-aqdas

dar tera jo sajde ko bana mere liye hai