ghairon se jab bhi maine koi mashwara liya

ġhairoñ se jab bhī maiñ ne koī mashvara liyā

ḳhud apne aap apnā tamāsha banā liyā

ik baar muskurā ke tirā naam kyā liyā

phir āsmāñ raqīboñ ne sar par uThā liyā

tasvīr to na us kī jalā.ī ga.ī magar

maiñ ne zarūr hāthoñ ko apne jalā liyā

dāman meñ tere kam na hoñ ḳhushiyāñ isī liye

maiñ ne ġhamoñ ko apne gale se lagā liyā

mahfil meñ daur jām-o-subū kā chalā to phir

maiñ ne bhī ek jaam tire naam kā liyā

anjām kā ḳhayāl bhī aaya nahīñ tujhe

ujlat meñ tū ne itnā baḌā faisla liyā

duniyā ko raas aatī kahāñ hai mirī ḳhushī

terī galī meñ aa ke 'taqī' muskurā liyā

ghairon se jab bhi main ne koi mashwara liya

KHud apne aap apna tamasha bana liya

ek bar muskura ke tera nam kya liya

phir aasman raqibon ne sar par uTha liya

taswir to na us ki jalai gai magar

main ne zarur hathon ko apne jala liya

daman mein tere kam na hon KHushiyan isi liye

main ne ghamon ko apne gale se laga liya

mahfil mein daur jam-o-subu ka chala to phir

main ne bhi ek jam tere nam ka liya

anjam ka KHayal bhi aaya nahin tujhe

ujlat mein tu ne itna baDa faisla liya

duniya ko ras aati kahan hai meri KHushi

teri gali mein aa ke 'taqi' muskura liya