ghairon se mil chale tum mast-e-sharab ho kar

ġhairoñ se mil chale tum mast-e-sharāb ho kar

ġhairat se rah ga.e ham yaksū kabāb ho kar

us rū-e-ātishīñ se burqā sarak gayā thā

gul bah gayā chaman meñ ḳhajlat se aab ho kar

kal raat muñd ga.ī thiiñ bahutoñ kī āñkheñ ġhash se

dekhā kiyā na kar to sarmast ḳhvāb ho kar

parda rahegā kyūñkar ḳhurshīd-e-ḳhāvarī kā

nikle hai vo bhī ab be-naqāb ho kar

yak qatra aab maiñ ne is daur meñ piyā hai

niklā hai chashm-e-tar se vo ḳhūn-e-nāb ho kar

aa baiThtā thā suufī har sub.h mai-kade meñ

shukr-e-ḳhudā ki niklā vaañ se ḳharāb ho kar

sharm-o-hayā kahāñ tak haiñ 'mīr' koī din ke

ab to milā karo tum Tuk be-hijāb ho kar

ghairon se mil chale tum mast-e-sharab ho kar

ghairat se rah gae hum yaksu kabab ho kar

us ru-e-atishin se burqa sarak gaya tha

gul bah gaya chaman mein KHajlat se aab ho kar

kal raat mund gai thin bahuton ki aankhen ghash se

dekha kiya na kar to sarmast KHwab ho kar

parda rahega kyunkar KHurshid-e-KHawari ka

nikle hai wo bhi ab be-naqab ho kar

yak qatra aab main ne is daur mein piya hai

nikla hai chashm-e-tar se wo KHun-e-nab ho kar

aa baiThta tha sufi har subh mai-kade mein

shukr-e-KHuda ki nikla wan se KHarab ho kar

sharm-o-haya kahan tak hain 'mir' koi din ke

ab to mila karo tum Tuk be-hijab ho kar