ghalat-fahmi kisi ki dur karta rah gaya hun

ġhalat-fahmī kisī kī duur kartā rah gayā huuñ

koī paiġhām huuñ maiñ aur likkhā rah gayā huuñ

bahut taklīf detā hai tirā ḳhāmosh rahnā

musalsal bolne se maiñ akelā rah gayā huuñ

koī dekhe binā guzrā hai mere sāmne se

kisī kā haath huuñ maiñ aur phailā rah gayā huuñ

bahut aage nikalne kī sazā hone se pahle

bahut pīchhe maiñ dānista dobāra rah gayā huuñ

uThā kar apnā sāmāñ mehmāñ jaane lagā hai

bahut hī zor se āvāz detā rah gayā huuñ

mujhe bāhar bulāyā sard mausam meñ kisī ne

maiñ apnī shā.irī ke saath baiThā rah gayā huuñ

tirī marzī hai jaisā bhī sulūk ab mujh se kar le

nishāñ ik paas tere maiñ kisī kā rah gayā huuñ

tire aane se maiñ ta.amīr hone lag gayā thā

tire jaate hī 'shāhid' sirf malba rah gayā huuñ

ghalat-fahmi kisi ki dur karta rah gaya hun

koi paigham hun main aur likkha rah gaya hun

bahut taklif deta hai tera KHamosh rahna

musalsal bolne se main akela rah gaya hun

koi dekhe bina guzra hai mere samne se

kisi ka hath hun main aur phaila rah gaya hun

bahut aage nikalne ki saza hone se pahle

bahut pichhe main danista dobara rah gaya hun

uTha kar apna saman mehman jaane laga hai

bahut hi zor se aawaz deta rah gaya hun

mujhe bahar bulaya sard mausam mein kisi ne

main apni shairi ke sath baiTha rah gaya hun

teri marzi hai jaisa bhi suluk ab mujh se kar le

nishan ek pas tere main kisi ka rah gaya hun

tere aane se main tamir hone lag gaya tha

tere jate hi 'shahid' sirf malba rah gaya hun