ghalat karta hun to kahte hain achchha kar rahe hain

ġhalat kartā huuñ to kahte haiñ achchhā kar rahe haiñ

ye kahne ke bajā.e aap ye kyā kar rahe haiñ

vagarna 'ishq itnā be-asar hotā nahīñ hai

yuuñ lagtā hai hameñ ye kaam bejā kar rahe haiñ

mohabbat se mukarne vāloñ se pūchhe to koī

ki kis ke kahne par ye log aisā kar rahe haiñ

kisī kī ab yahāñ par koī bhī suntā nahīñ hai

ġhanīmat hai ki ham ab bhī bharosa kar rahe haiñ

bahut hañste the jab thā iḳhtiyār us par hamārā

aur ab bas meñ nahīñ hai vo to girya kar rahe haiñ

bahut se aur bhī haiñ 'ishq ke maare yahāñ par

nahīñ aisā ki ham ye kaam tanhā kar rahe haiñ

mohabbat 'ishq vaqtī uns chāhat aur lagāo

na jaane kyā hai jo ham us kī parvā kar rahe haiñ

hameñ mā'lūm hai mumkin nahīñ pā lenā us ko

ye kyā ki phir bhī ham us kī tamanna kar rahe haiñ

'doraib' āsān kab hai zindagī itnī vagarna

koī to baat hai jo ham guzārā kar rahe haiñ

ghalat karta hun to kahte hain achchha kar rahe hain

ye kahne ke bajae aap ye kya kar rahe hain

wagarna 'ishq itna be-asar hota nahin hai

yun lagta hai hamein ye kaam beja kar rahe hain

mohabbat se mukarne walon se puchhe to koi

ki kis ke kahne par ye log aisa kar rahe hain

kisi ki ab yahan par koi bhi sunta nahin hai

ghanimat hai ki hum ab bhi bharosa kar rahe hain

bahut hanste the jab tha iKHtiyar us par hamara

aur ab bas mein nahin hai wo to girya kar rahe hain

bahut se aur bhi hain 'ishq ke mare yahan par

nahin aisa ki hum ye kaam tanha kar rahe hain

mohabbat 'ishq waqti uns chahat aur lagao

na jaane kya hai jo hum us ki parwa kar rahe hain

hamein ma'lum hai mumkin nahin pa lena us ko

ye kya ki phir bhi hum us ki tamanna kar rahe hain

'doraib' aasan kab hai zindagi itni wagarna

koi to baat hai jo hum guzara kar rahe hain