غلط کہ میری نگاہوں کو پارسا کہئے

غلط کہ میری نگاہوں کو پارسا کہئے

یہ رعب حسن سے اٹھتی نہیں ہیں کیا کہئے

ادھر یہ حال کہ دل سرکشی پہ آمادہ

ادھر اشارۂ ابرو کہ سب بجا کہئے

انہیں یہ شوق سنیں اور غیر بن کے سنیں

ہمیں یہ ضد کہ کسی اجنبی سے کیا کہئے

یہ کیا کہ سچ بھی کہوں میں تو کذب ہی ٹھہرے

غلط کہے جو اگر غیر مرحبا کہئے

گزارشوں کو مری شوخیاں نہ ٹھہرائیں

سزا کو آپ نہ اس طرح ناسزا کہئے

جنوں نوازوں کی روداد خونچکاں لکھیے

حکایت روش منزل آشنا کہئے

جہان بھر سے تپشؔ دوستی نہیں اچھی

اگر یہ راس بھی آئے تو معجزہ کہئے