ghalat ki meri nigahon ko parsa kahiye

ġhalat ki merī nigāhoñ ko pārsā kahiye

ye ro'b-e-husn se uThtī nahīñ haiñ kyā kahiye

idhar ye haal ki dil sarkashī pe āmāda

udhar ishāra-e-abrū ki sab bajā kahiye

unheñ ye shauq suneñ aur ġhair ban ke suneñ

hameñ ye zid ki kisī ajnabī se kyā kahiye

ye kyā ki sach bhī kahūñ maiñ to kizb hī Thahre

ġhalat kahe jo agar ġhair marhabā kahiye

guzārishoñ ko mirī shoḳhiyāñ na Thahrā.eñ

sazā ko aap na is tarh nā-sazā kahiye

junūñ-navāzoñ kī rūdād-e-ḳhūñ-chakāñ likhiye

hikāyat-e-ravish-e-manzil-āshnā kahiye

jahān-bhar se 'tapish' dostī nahīñ achchhī

agar ye raas bhī aa.e to mo'jiza kahiye

ghalat ki meri nigahon ko parsa kahiye

ye ro'b-e-husn se uThti nahin hain kya kahiye

idhar ye haal ki dil sarkashi pe aamada

udhar ishaara-e-abru ki sab baja kahiye

unhen ye shauq sunen aur ghair ban ke sunen

hamein ye zid ki kisi ajnabi se kya kahiye

ye kya ki sach bhi kahun main to kizb hi Thahre

ghalat kahe jo agar ghair marhaba kahiye

guzarishon ko meri shoKHiyan na Thahraen

saza ko aap na is tarh na-saza kahiye

junun-nawazon ki rudad-e-KHun-chakan likhiye

hikayat-e-rawish-e-manzil-ashna kahiye

jahan-bhar se 'tapish' dosti nahin achchhi

agar ye ras bhi aae to mo'jiza kahiye