ghalatiyan apni na hon phir bhi manane ka hunar

ġhalatiyāñ apnī na hoñ phir bhī manāne kā hunar

itnā āsān nahīñ ḳhud ko miTāne kā hunar

yādoñ ke sāñpoñ ko qaabū meñ karūñ kaise maiñ

maiñ ne sīkhā hī nahīñ biin bajāne kā hunar

mere chehre kī hañsī meñ patā ḳhushiyoñ kā na DhūñDh

muddatoñ baa'd milā dard chhupāne kā hunar

mere apnoñ ne tarāshī merī 'izzat kī qamīs

sab ko aatā hai yahāñ qaiñchī chalāne kā hunar

aag chingārī dhuāñ kuchh na thā dil phir bhī jalā

kis ne sikhlāyā tumheñ aise jalāne kā hunar

itne sapne na dikhā jhūTī adākārī chhoḌ

pattharoñ ko na sikhā ghaas ugāne kā hunar

āñkheñ chehra zabāñ sab be-zabāñ ho jaate haiñ

jaan le legā tirī raaz chhupāne kā hunar

qatl karnā hai agar jalte hue sūraj ko

siikh lo barf kī shamshīr banāne kā hunar

ghalatiyan apni na hon phir bhi manane ka hunar

itna aasan nahin KHud ko miTane ka hunar

yaadon ke sanpon ko qabu mein karun kaise main

main ne sikha hi nahin bin bajaane ka hunar

mere chehre ki hansi mein pata KHushiyon ka na DhunDh

muddaton ba'd mila dard chhupane ka hunar

mere apnon ne tarashi meri 'izzat ki qamis

sab ko aata hai yahan qainchi chalane ka hunar

aag chingari dhuan kuchh na tha dil phir bhi jala

kis ne sikhlaya tumhein aise jalane ka hunar

itne sapne na dikha jhuTi adakari chhoD

pattharon ko na sikha ghas ugane ka hunar

aankhen chehra zaban sab be-zaban ho jate hain

jaan le lega teri raaz chhupane ka hunar

qatl karna hai agar jalte hue suraj ko

sikh lo barf ki shamshir banane ka hunar