gale mein hath the shab us pari se rahen thin

gale meñ haath the shab us parī se rāheñ thiiñ

sahar huī to vo āñkheñ na vo nigāheñ thiiñ

nikal ke chehre pe maidān saaf ḳhat ne kiyā

kabhī ye shahr thā aisā ki band rāheñ thiiñ

firāq meñ tire āshiq ko jā ke kal dekhā

ki vo to hech thā kuchh ashk the kuchh aa.heñ thiiñ

bagūle ab haiñ ki ġhurbat hai gor-e-shāhañ par

saroñ pe chatr jilau meñ kabhī sipāheñ thiiñ

hazāroñ loT ga.e kal uThī jo vo chilman

ḳhadañg mū-e-mizha barchhiyāñ nigāheñ thiiñ

kiyā ye shauq ne andhā mujhe na sūjhā kuchh

vagarna rabt kī us se hazār rāheñ thiiñ

ye zo.af hai ki nikaltī nahīñ haiñ ab dil se

kabhī falak se bhī ūñchī hamārī aa.heñ thiiñ

jigar meñ hijr kī kal chubh rahī thiiñ kuchh fāñseñ

magar jo ġhaur se dekhā tirī nigāheñ thiiñ

pahuñch ga.e sar-e-manzil chale jo chaal na.ī

unhīñ meñ pher thā dekhī huī jo rāheñ thiiñ

falak ke daur se duniyā badal ga.ī varna

jahāñ bane haiñ ye mai-ḳhāne ḳhān-qāheñ thiiñ

ye zo.af ab hai ki hilnā girāñ hai qadmoñ ko

subuk-ravī meñ kabhī in ko dastgāheñ thiiñ

mushā.ere se hasīñ kyuuñ na chhīn le jaate

rubā.iyāñ mirī chaugoshiya kulāheñ thiiñ

hasīn zar ke haiñ tālib ki ab haiñ gird-e-'amīr'

ġharīb ham the to ye pyaar thā na chāheñ thiiñ

gale mein hath the shab us pari se rahen thin

sahar hui to wo aankhen na wo nigahen thin

nikal ke chehre pe maidan saf KHat ne kiya

kabhi ye shahr tha aisa ki band rahen thin

firaq mein tere aashiq ko ja ke kal dekha

ki wo to hech tha kuchh ashk the kuchh aahen thin

bagule ab hain ki ghurbat hai gor-e-shahan par

saron pe chatr jilau mein kabhi sipahen thin

hazaron loT gae kal uThi jo wo chilman

KHadang mu-e-mizha barchhiyan nigahen thin

kiya ye shauq ne andha mujhe na sujha kuchh

wagarna rabt ki us se hazar rahen thin

ye zoaf hai ki nikalti nahin hain ab dil se

kabhi falak se bhi unchi hamari aahen thin

jigar mein hijr ki kal chubh rahi thin kuchh fansen

magar jo ghaur se dekha teri nigahen thin

pahunch gae sar-e-manzil chale jo chaal nai

unhin mein pher tha dekhi hui jo rahen thin

falak ke daur se duniya badal gai warna

jahan bane hain ye mai-KHane KHan-qahen thin

ye zoaf ab hai ki hilna giran hai qadmon ko

subuk-rawi mein kabhi in ko dastgahen thin

mushaere se hasin kyun na chhin le jate

rubaiyan meri chaugoshiya kulahen thin

hasin zar ke hain talib ki ab hain gird-e-'amir'

gharib hum the to ye pyar tha na chahen thin