گلے ملیں تو بنا رہتا ہے گماں دیوار

گلے ملیں تو بنا رہتا ہے گماں دیوار

یہ اور بات کہ ہوتی نہیں عیاں دیوار

طواف کرتے ہو اپنا تمہیں نہیں معلوم

میان مرحلۂ آگہی ہے جاں دیوار

رواں دواں جو اٹھے ہم کشاں کشاں لوٹے

زمیں تھی ایک رکاوٹ تو آسماں دیوار

ہے سوچ سایہ خیال و نظر پہ چھایا ہوا

ہیں ریزہ ریزہ فصیلیں دھواں دھواں دیوار

بڑھوں تو کیسے بڑھوں کس کے در پہ دستک دوں

قدم قدم پہ احاطے جہاں تہاں دیوار

چھپائے رکھتے ہیں بے چہرگی کسی صورت

اٹھائے پھرتے ہیں ذہنوں کے درمیاں دیوار