gale se shab ko lagaya sahar ke dhoke mein

gale se shab ko lagāyā sahar ke dhoke meñ

ham aa ga.e haiñ ḳhud apnī nazar ke dhoke meñ

idhar hai aag kā dariyā udhar lahū kī nadī

kahāñ pahuñch ga.e ham rāhbar ke dhoke meñ

kabhī chale the jahāñ se usī maqām pe haiñ

the dā.eroñ meñ ravāñ ham safar ke dhoke meñ

fareb-e-husn-e-nazar hai ki sādgī dil kī

hamesha sang chune haiñ guhar ke dhoke meñ

abhī to zulmat-e-shab kā tilism baaqī hai

abhī na sham.a bujhāo sahar ke dhoke meñ

fazā.eñ ajnabī begāna sūrateñ 'akram'

kahāñ ye aa ga.e ham apne ghar ke dhoke meñ

gale se shab ko lagaya sahar ke dhoke mein

hum aa gae hain KHud apni nazar ke dhoke mein

idhar hai aag ka dariya udhar lahu ki nadi

kahan pahunch gae hum rahbar ke dhoke mein

kabhi chale the jahan se usi maqam pe hain

the daeron mein rawan hum safar ke dhoke mein

fareb-e-husn-e-nazar hai ki sadgi dil ki

hamesha sang chune hain guhar ke dhoke mein

abhi to zulmat-e-shab ka tilism baqi hai

abhi na shama bujhao sahar ke dhoke mein

fazaen ajnabi begana suraten 'akram'

kahan ye aa gae hum apne ghar ke dhoke mein