gali ka aam sa chehra bhi pyara hone lagta hai

galī kā aam sā chehra bhī pyārā hone lagtā hai

mohabbat meñ to zarra bhī sitārā hone lagtā hai

yahāñ gum-sum se logoñ par kabhī palkeñ nahīñ uTThīñ

ishārā karne vāloñ ko ishārā hone lagtā hai

hamārī zindagī par hai hamāre ishq kā saaya

ki ham jo kaam karte haiñ ḳhasārā hone lagtā hai

mohabbat kī adālat bhī bhalā kaisī adālat hai

ki jab bhī uThne lagte haiñ pukārā hone lagtā hai

zamīn o āsmāñ ke saare sahrā raqs karte haiñ

kisī par ishq jab bhī āshkārā hone lagtā hai

'atā' be-sabr logoñ ke kabhī bartan nahīñ bharte

guzāra karne vāloñ kā guzārā hone lagtā hai

gali ka aam sa chehra bhi pyara hone lagta hai

mohabbat mein to zarra bhi sitara hone lagta hai

yahan gum-sum se logon par kabhi palken nahin uTThin

ishaara karne walon ko ishaara hone lagta hai

hamari zindagi par hai hamare ishq ka saya

ki hum jo kaam karte hain KHasara hone lagta hai

mohabbat ki adalat bhi bhala kaisi adalat hai

ki jab bhi uThne lagte hain pukara hone lagta hai

zamin o aasman ke sare sahra raqs karte hain

kisi par ishq jab bhi aashkara hone lagta hai

'ata' be-sabr logon ke kabhi bartan nahin bharte

guzara karne walon ka guzara hone lagta hai