گلیوں گلیوں شور مچا ہے اک فتنہ بیدار ہوا

گلیوں گلیوں شور مچا ہے اک فتنہ بیدار ہوا

صبر و سکوں کے لمحے غارت زیست سے جی بیزار ہوا

ظلم و ستم معیار سیاست کذب و ریا اقدار حیات

حرف صداقت کم ظرفوں میں کتنا ذلیل و خوار ہوا

جن کے لبوں پر حرف وفا تھا جن کی زباں پر صدق و صفا

ان کی اک اک طرز ادا پر اہل خرد کا وار ہوا

پہلے بھی کب گھر میں سکوں تھا کس کو فراغت حاصل تھی

لیکن اب تو لمحہ لمحہ خنجر اور تلوار ہوا

ہم بھی مدح سرائی کرتے ہم بھی قصیدہ گو ہوتے

شکر ہے خواہش جاہ میں حائل شاعر کا پندار ہوا

ترک تعلق کرنے پر میں کیا کیا قہر سے گزرا ہوں

واصلؔ زیست کا لمحہ لمحہ خود مجھ سے بیزار ہوا