galiyon galiyon shor macha hai ek fitna bedar hua

galiyoñ galiyoñ shor machā hai ik fitna bedār huā

sabr-o-sukūñ ke lamhe ġhārat ziist se jī bezār huā

zulm-o-sitam me.ār-e-siyāsat kizb-o-riyā aqdār-e-hayāt

harf-e-sadāqat kam-zarfoñ meñ kitnā zalīl-o-ḳhvār huā

jin ke laboñ par harf-e-vafā thā jin kī zabāñ par sidq-o-safā

un kī ik ik tarz-e-adā par ahl-e-ḳhirad kā vaar huā

pahle bhī kab ghar meñ sukūñ thā kis ko farāġhat hāsil thī

lekin ab to lamha lamha ḳhanjar aur talvār huā

ham bhī mad.h-sarā.ī karte ham bhī qasīda-go hote

shukr hai ḳhvāhish-e-jāh meñ haa.il shā.ir kā pindār huā

tark-e-ta.alluq karne par maiñ kyā kyā qahr se guzrā huuñ

'vāsil' ziist kā lamha lamha ḳhud mujh se bezār huā

galiyon galiyon shor macha hai ek fitna bedar hua

sabr-o-sukun ke lamhe ghaarat zist se ji bezar hua

zulm-o-sitam mear-e-siyasat kizb-o-riya aqdar-e-hayat

harf-e-sadaqat kam-zarfon mein kitna zalil-o-KHwar hua

jin ke labon par harf-e-wafa tha jin ki zaban par sidq-o-safa

un ki ek ek tarz-e-ada par ahl-e-KHirad ka war hua

pahle bhi kab ghar mein sukun tha kis ko faraghat hasil thi

lekin ab to lamha lamha KHanjar aur talwar hua

hum bhi madh-sarai karte hum bhi qasida-go hote

shukr hai KHwahish-e-jah mein hail shair ka pindar hua

tark-e-talluq karne par main kya kya qahr se guzra hun

'wasil' zist ka lamha lamha KHud mujh se bezar hua