gham de ke gham-gusar hue bhi to kya hue

ġham de ke ġham-gusār hue bhī to kyā hue

taḌpā ke be-qarār hue bhī to kyā hue

karnā thā daaġh ban ke kisī dil meñ raushnī

sham.a-e-sar-e-mazār hue bhī to kyā hue

honā thā aap apne chaman meñ shagūfa-kār

sharminda-e-bahār hue bhī to kyā hue

miTte kisī ke ishq meñ ai dil to baat thī

barbād-e-rozgār hue bhī to kyā hue

dil bhī hai pāsh-pāsh safīna bhī pāsh-pāsh

tūfān-e-ġham se paar hue bhī to kyā hue

vīrāniyāñ dayār-e-mohabbat meñ haiñ vahī

tum ġhairat-e-bahār hue bhī to kyā hue

haiñ sar-nigūñ hanūz tumhāre niyāz-mand

tum ahl-e-iḳhtiyār hue bhī to kyā hue

siine meñ dil ke naam se ab ḳhaak bhī nahīñ

ab aap sharmsār hue bhī to kyā hue

hañs hañs ke jhelnā hai har uftād-e-shauq ko

ro ro ke kāmgār hue bhī to kyā hue

hai sāmnā fareb-e-mohabbat kā har-nafas

ik un se hoshiyār hue bhī to kyā hue

barham agar sukūn-e-do-ālam na ho sakā

yuuñ husn par nisār hue bhī to kyā hue

hai zindagī 'adīb' kī ab bhī hijāb meñ

ham us ke rāz-dār hue bhī to kyā hue

gham de ke gham-gusar hue bhi to kya hue

taDpa ke be-qarar hue bhi to kya hue

karna tha dagh ban ke kisi dil mein raushni

shama-e-sar-e-mazar hue bhi to kya hue

hona tha aap apne chaman mein shagufa-kar

sharminda-e-bahaar hue bhi to kya hue

miTte kisi ke ishq mein ai dil to baat thi

barbaad-e-rozgar hue bhi to kya hue

dil bhi hai pash-pash safina bhi pash-pash

tufan-e-gham se par hue bhi to kya hue

viraniyan dayar-e-mohabbat mein hain wahi

tum ghairat-e-bahaar hue bhi to kya hue

hain sar-nigun hanuz tumhaare niyaz-mand

tum ahl-e-iKHtiyar hue bhi to kya hue

sine mein dil ke nam se ab KHak bhi nahin

ab aap sharmsar hue bhi to kya hue

hans hans ke jhelna hai har uftad-e-shauq ko

ro ro ke kaamgar hue bhi to kya hue

hai samna fareb-e-mohabbat ka har-nafas

ek un se hoshiyar hue bhi to kya hue

barham agar sukun-e-do-alam na ho saka

yun husn par nisar hue bhi to kya hue

hai zindagi 'adib' ki ab bhi hijab mein

hum us ke raaz-dar hue bhi to kya hue