gham diye hain to masarrat ke guhar bhi dena

ġham diye haiñ to masarrat ke guhar bhī denā

ai ḳhudā tū mujhe jiine kā hunar bhī denā

hākim-e-vaqt ye hijrat mujhe manzūr magar

dam-e-ruḳhsat mujhe sāmān-e-safar bhī denā

ai shab-o-roz ke mālik mujhe is duniyā meñ

lailatul-qadr kī mānind sahar bhī denā

sun zarā ġhaur se sun ai shajar-e-sāya-fagan

jab tire saa.e meñ pahuñchūñ to samar bhī denā

lafz nikleñ jo zabāñ se to diloñ tak pahuñcheñ

merī taqrīr meñ kuchh aisā asar bhī denā

tere altāf-o-karam kī hai bahar-sū shohrat

māl-o-zar degā hī to la.al-o-gohar bhī denā

tū jo shamshīr-ba-kaf ho to maiñ sar pesh karūñ

jo haiñ dil vaale unheñ aatā hai sar bhī denā

baḳhshne vaale zamāne ko jamāl-e-har-rañg

jo tujhe dekh sake aisī nazar bhī denā

le chalā maiñ tirī jannat se bayābāñ kī taraf

sar chhupāne ko vahāñ tū mujhe ghar bhī denā

harf aa jaa.e na tujh par kahīñ kam-zarfī kā

dāman-e-'shams' ko tū dīda-e-tar bhī denā

gham diye hain to masarrat ke guhar bhi dena

ai KHuda tu mujhe jine ka hunar bhi dena

hakim-e-waqt ye hijrat mujhe manzur magar

dam-e-ruKHsat mujhe saman-e-safar bhi dena

ai shab-o-roz ke malik mujhe is duniya mein

lailatul-qadr ki manind sahar bhi dena

sun zara ghaur se sun ai shajar-e-saya-fagan

jab tere sae mein pahunchun to samar bhi dena

lafz niklen jo zaban se to dilon tak pahunchen

meri taqrir mein kuchh aisa asar bhi dena

tere altaf-o-karam ki hai bahar-su shohrat

mal-o-zar dega hi to lal-o-gohar bhi dena

tu jo shamshir-ba-kaf ho to main sar pesh karun

jo hain dil wale unhen aata hai sar bhi dena

baKHshne wale zamane ko jamal-e-har-rang

jo tujhe dekh sake aisi nazar bhi dena

le chala main teri jannat se bayaban ki taraf

sar chhupane ko wahan tu mujhe ghar bhi dena

harf aa jae na tujh par kahin kam-zarfi ka

daman-e-'shams' ko tu dida-e-tar bhi dena