gham-e-ayyam ki zinda nishani dekhte jao

ġham-e-ayyām kī zinda nishānī dekhte jaao

bahut mash.hūr hai merī kahānī dekhte jaao

dil-e-mahjūr kā tum ko agar ho imtihāñ maqsūd

haiñ us ke naqsh tahrīrī zabānī dekhte jaao

kuchh aise lafz hote haiñ jo nashtar ban ke lagte haiñ

mafar mushkil musībat nā-gahānī dekhte jaao

tashaffī kar lo dil kī faal hī se aas bañdh jaa.e

kab aa.egī koī saa.at suhānī dekhte jaao

sharar-afshāñ agar aaheñ to diide ashk se labrez

hue aamez kyūñkar aag paanī dekhte jaao

ilāj-e-karb kī ḳhātir hai lāzim dil rahe yaksū

jo hoñ bīmār āñkheñ rang dhānī dekhte jaao

ḳhudā rakkhe hai kuchh dīvān-e-‘sāqī’ bhī jazāk-allāh

salāsat dekhte jaao ravānī dekhte jaao

gham-e-ayyam ki zinda nishani dekhte jao

bahut mashhur hai meri kahani dekhte jao

dil-e-mahjur ka tum ko agar ho imtihan maqsud

hain us ke naqsh tahriri zabani dekhte jao

kuchh aise lafz hote hain jo nashtar ban ke lagte hain

mafar mushkil musibat na-gahani dekhte jao

tashaffi kar lo dil ki fal hi se aas bandh jae

kab aaegi koi saat suhani dekhte jao

sharar-afshan agar aahen to dide ashk se labrez

hue aamez kyunkar aag pani dekhte jao

ilaj-e-karb ki KHatir hai lazim dil rahe yaksu

jo hon bimar aankhen rang dhani dekhte jao

KHuda rakkhe hai kuchh diwan-e-‘saqi’ bhi jazak-allah

salasat dekhte jao rawani dekhte jao