gham-e-dauran ka mudawa gham-e-jaanan bhi nahin

ġham-e-daurāñ kā mudāvā ġham-e-jānāñ bhī nahīñ

ziist dushvār nahīñ hai to kuchh āsāñ bhī nahīñ

arsa-e-dahr se ham ahl-e-junūñ ko nisbat

is kī vus.at ba-had-e-ālam-e-imkāñ bhī nahīñ

har-nafas ek ḳhalish sī hai rag-e-jāñ ke qarīb

aur nashtar koī paivast-e-rag-e-jāñ bhī nahīñ

dekhiye vaqt ne kis kis ke uḌaa.e purze

un kā dāman bhī nahīñ merā garebāñ bhī nahīñ

ek hī mard-e-haq-āgāh hai banda yā-rab

ki ye kāfir jo nahīñ hai to musalmāñ bhī nahīñ

manzil-e-ġham se guzarnā hai aur is par 'jābir'

dasht-e-vahshat meñ kisī shoḳh kā dāmāñ bhī nahīñ

gham-e-dauran ka mudawa gham-e-jaanan bhi nahin

zist dushwar nahin hai to kuchh aasan bhi nahin

arsa-e-dahr se hum ahl-e-junun ko nisbat

is ki wusat ba-had-e-alam-e-imkan bhi nahin

har-nafas ek KHalish si hai rag-e-jaan ke qarib

aur nashtar koi paiwast-e-rag-e-jaan bhi nahin

dekhiye waqt ne kis kis ke uDae purze

un ka daman bhi nahin mera gareban bhi nahin

ek hi mard-e-haq-agah hai banda ya-rab

ki ye kafir jo nahin hai to musalman bhi nahin

manzil-e-gham se guzarna hai aur is par 'jabir'

dasht-e-wahshat mein kisi shoKH ka daman bhi nahin