gham-e-dil hi gham-e-dauran gham-e-jaanana banta hai

ġham-e-dil hī ġham-e-daurāñ ġham-e-jānāna bantā hai

yahī ġham sher bantā hai yahī afsāna bantā hai

isī se garmī-e-dār-o-rasan hai inqilāboñ meñ

bahāroñ meñ yahī zulf-o-qad-e-jānāna bantā hai

saroñ ke ḳhum surāhī gardanoñ kī jaam zaḳhmoñ ke

muhayyā jab ye ho lete haiñ tab mai-ḳhāna bantā hai

bigaḌtā kyā hai parvāne kā jal kar ḳhaak hone meñ

ki phir parvāne hī kī ḳhaak se parvāna bantā hai

nigāh-e-kam se merī chāk-dāmānī ko mat dekho

hazāroñ hoshyāroñ meñ koī dīvāna bantā hai

ḳharīdā jā nahīñ saktā hai saaqī zarf rindoñ kā

bahut shīshe pighalte haiñ to ik paimāna bantā hai

mire hī donoñ haath aate haiñ kaam un ke sañvarne meñ

dikhātā hai koī ā.īna koī shāna bantā hai

baḌā sarmāya hai sab kuchh luTā denā mohabbat meñ

faqīrāna libās aate haiñ dil shāhāna bantā hai

gham-e-dil hi gham-e-dauran gham-e-jaanana banta hai

yahi gham sher banta hai yahi afsana banta hai

isi se garmi-e-dar-o-rasan hai inqilabon mein

bahaaron mein yahi zulf-o-qad-e-jaanana banta hai

saron ke KHum surahi gardanon ki jam zaKHmon ke

muhayya jab ye ho lete hain tab mai-KHana banta hai

bigaDta kya hai parwane ka jal kar KHak hone mein

ki phir parwane hi ki KHak se parwana banta hai

nigah-e-kam se meri chaak-damani ko mat dekho

hazaron hoshyaron mein koi diwana banta hai

KHarida ja nahin sakta hai saqi zarf rindon ka

bahut shishe pighalte hain to ek paimana banta hai

mere hi donon hath aate hain kaam un ke sanwarne mein

dikhata hai koi aaina koi shana banta hai

baDa sarmaya hai sab kuchh luTa dena mohabbat mein

faqirana libas aate hain dil shahana banta hai