gham-e-dil ki zaban ahl-e-tashaddud kam samajhte hain

ġham-e-dil kī zabāñ ahl-e-tashaddud kam samajhte haiñ

na dil ko dil samajhte haiñ na ġham ko ġham samajhte haiñ

vo kahte haiñ ki hañsnā hai dil-e-insāñ kī kamzorī

navā-e-zindagī ko ziist kā mātam samajhte haiñ

junūn-e-kusht-o-ḳhūn ko naam dete haiñ shujā.at kā

amāvas kī shab-e-tārīk ko pūnam samajhte haiñ

ravādārī ko ham samjhe hue haiñ dard kā darmāñ

mohabbat ko dil-e-majrūh kā marham samajhte haiñ

'mahāvīr' aur 'gautam' aur 'gāñdhī' jis ke rahrav the

ta.ajjub hai ki ham us raah ko pur-ḳham samajhte haiñ

banāyā hai ahinsā ko usūl-e-zindagī ham ne

sukūn-e-zindagī kā raaz 'tālib' ham samajhte haiñ

gham-e-dil ki zaban ahl-e-tashaddud kam samajhte hain

na dil ko dil samajhte hain na gham ko gham samajhte hain

wo kahte hain ki hansna hai dil-e-insan ki kamzori

nawa-e-zindagi ko zist ka matam samajhte hain

junun-e-kusht-o-KHun ko nam dete hain shujaat ka

amawas ki shab-e-tarik ko punam samajhte hain

rawadari ko hum samjhe hue hain dard ka darman

mohabbat ko dil-e-majruh ka marham samajhte hain

'mahawir' aur 'gautam' aur 'gandhi' jis ke rahraw the

tajjub hai ki hum us rah ko pur-KHam samajhte hain

banaya hai ahinsa ko usul-e-zindagi hum ne

sukun-e-zindagi ka raaz 'talib' hum samajhte hain