gham-e-dil se gham-e-sud-o-ziyan tak baat aa pahunchi

ġham-e-dil se ġham-e-sūd-o-ziyāñ tak baat aa pahuñchī

mohabbat kā ḳhudā-hāfiz yahāñ tak baat aa pahuñchī

yahāñ to ho rahā thā rahzanoñ kā tazkira lekin

na jaane kyoñ amīr-e-kārvāñ tak baat aa pahuñchī

koī kartā bhī kyā phir ehtisāb-e-laġhzish-e-rindāñ

ki aate aate ḳhud pīr-e-muġhāñ tak baat aa pahuñchī

hamāre zabt ko bhī log kahte haiñ karam un kā

kahāñ tak sabr karte ham yahāñ tak baat aa pahuñchī

ḳhudā hī jaane kyā biite navāsanjān-e-gulshan par

ki ab phūloñ se baḌh kar bāġhbāñ tak baat aa pahuñchī

the apnī fat.h par nāzāñ nasheman phūñkne vaale

ḳhabar kyā thī binā-e-gulsitāñ tak baat aa pahuñchī

kise ma.alūm 'jauhar' ab ruḳh-e-insāf kyā hogā

haqīqat se chalī thī aur gumāñ tak baat aa pahuñchī

gham-e-dil se gham-e-sud-o-ziyan tak baat aa pahunchi

mohabbat ka KHuda-hafiz yahan tak baat aa pahunchi

yahan to ho raha tha rahzanon ka tazkira lekin

na jaane kyon amir-e-karwan tak baat aa pahunchi

koi karta bhi kya phir ehtisab-e-laghzish-e-rindan

ki aate aate KHud pir-e-mughan tak baat aa pahunchi

hamare zabt ko bhi log kahte hain karam un ka

kahan tak sabr karte hum yahan tak baat aa pahunchi

KHuda hi jaane kya bite nawasanjaan-e-gulshan par

ki ab phulon se baDh kar baghban tak baat aa pahunchi

the apni fath par nazan nasheman phunkne wale

KHabar kya thi bina-e-gulsitan tak baat aa pahunchi

kise malum 'jauhar' ab ruKH-e-insaf kya hoga

haqiqat se chali thi aur guman tak baat aa pahunchi