gham-e-duniya agar kuchh muKHtasar hota to kya hota

ġham-e-duniyā agar kuchh muḳhtasar hotā to kyā hotā

jo ye ġham muḳhtasar hotā bashar hotā to kyā hotā

ye fikr-e-hāl yād-e-'ahd-e-māzī ik musībat hai

jo mustaqbil se insāñ bā-ḳhabar hotā to kyā hotā

zamīn-o-āsmāñ kī gardisheñ to sab mu'ayyan haiñ

agar bil-farz aahoñ meñ asar hotā to kyā hotā

ye saarā khel duniyā kā hai qaa.em kam-nigāhī par

agar insāñ kahīñ sāhib-nazar hotā to kyā hotā

farishtoñ ne kiyā insāñ ko sajda hukm-e-ḳhāliq se

jo ye farmāñ ba-andāz-e-digar hotā to kyā hotā

ye zikr-e-jannat-o-dozaḳh pe hañs kar rind kahte haiñ

ḳhudā-nā-karda qissa mo'tabar hotā to kyā hotā

nazar mahdūd jalve muntashir haiñ ik qayāmat hai

agar har jalva pāband-e-nazar hotā to kyā hotā

ye terī be-zarī aur hāsidoñ kā ye hasad tauba

agar ai 'amn' tere paas zar hotā to kyā hotā

gham-e-duniya agar kuchh muKHtasar hota to kya hota

jo ye gham muKHtasar hota bashar hota to kya hota

ye fikr-e-haal yaad-e-'ahd-e-mazi ek musibat hai

jo mustaqbil se insan ba-KHabar hota to kya hota

zamin-o-asman ki gardishen to sab mu'ayyan hain

agar bil-farz aahon mein asar hota to kya hota

ye sara khel duniya ka hai qaem kam-nigahi par

agar insan kahin sahib-nazar hota to kya hota

farishton ne kiya insan ko sajda hukm-e-KHaliq se

jo ye farman ba-andaz-e-digar hota to kya hota

ye zikr-e-jannat-o-dozaKH pe hans kar rind kahte hain

KHuda-na-karda qissa mo'tabar hota to kya hota

nazar mahdud jalwe muntashir hain ek qayamat hai

agar har jalwa paband-e-nazar hota to kya hota

ye teri be-zari aur hasidon ka ye hasad tauba

agar ai 'amn' tere pas zar hota to kya hota