غم دنیا اگر کچھ مختصر ہوتا تو کیا ہوتا

غم دنیا اگر کچھ مختصر ہوتا تو کیا ہوتا

جو یہ غم مختصر ہوتا بشر ہوتا تو کیا ہوتا

یہ فکر حال یاد عہد ماضی اک مصیبت ہے

جو مستقبل سے انساں با خبر ہوتا تو کیا ہوتا

زمین و آسماں کی گردشیں تو سب معین ہیں

اگر بالفرض آہوں میں اثر ہوتا تو کیا ہوتا

یہ سارا کھیل دنیا کا ہے قائم کم نگاہی پر

اگر انساں کہیں صاحب نظر ہوتا تو کیا ہوتا

فرشتوں نے کیا انساں کو سجدہ حکم خالق سے

جو یہ فرماں بہ انداز دگر ہوتا تو کیا ہوتا

یہ ذکر جنت و دوزخ پہ ہنس کر رند کہتے ہیں

خدا ناکردہ قصہ معتبر ہوتا تو کیا ہوتا

نظر محدود جلوے منتشر ہیں اک قیامت ہے

اگر ہر جلوہ پابند نظر ہوتا تو کیا ہوتا

یہ تیری بے زری اور حاسدوں کا یہ حسد توبہ

اگر اے امنؔ تیرے پاس زر ہوتا تو کیا ہوتا