gham-e-firaq ka khaTka visal-e-yar mein hai

ġham-e-firāq kā khaTkā visāl-e-yār meñ hai

ḳhizāñ kā ḳhauf hameñ mausam-e-bahār meñ hai

nikal ke jism se āñkhoñ meñ aa ke Thahrī hai

hamārī rūh-e-ravāñ kis ke intizār meñ hai

kisī ko naqd-e-shahādat na de sakī ab tak

barā.e naam ye kauḌī tirī kaTār meñ hai

kudūrat un ko hai mujh se ye saaf sābit hai

jo ḳhat likhā hai to vo bhī ḳhat-e-ġhubār meñ hai

shab-e-firāq ke sadme uThā.ūñgā kyūñkar

sakat zarā bhī nahīñ ab to jān-e-zār meñ hai

gunāhgār rahūñ sadqe hotī hai rahmat

vo dozaḳhī huuñ ki jannat bhī iḳhtiyār meñ hai

na jāniyegā ki maiñ duur duur rahtā huuñ

tasavvur aap kā har dam mirī kanār meñ hai

dam aa ke āñkhoñ meñ dekhe to raah un kī magar

ġhazab ye hai ki taġhāful mizāj-e-yār meñ hai

shab-e-firāq kā pūchho na haal kuchh 'vahbī'

ziyāda hashr ke din se mire shumār meñ hai

gham-e-firaq ka khaTka visal-e-yar mein hai

KHizan ka KHauf hamein mausam-e-bahaar mein hai

nikal ke jism se aankhon mein aa ke Thahri hai

hamari ruh-e-rawan kis ke intizar mein hai

kisi ko naqd-e-shahadat na de saki ab tak

barae nam ye kauDi teri kaTar mein hai

kudurat un ko hai mujh se ye saf sabit hai

jo KHat likha hai to wo bhi KHat-e-ghubar mein hai

shab-e-firaq ke sadme uThaunga kyunkar

sakat zara bhi nahin ab to jaan-e-zar mein hai

gunahgar rahun sadqe hoti hai rahmat

wo dozaKHi hun ki jannat bhi iKHtiyar mein hai

na jaaniyega ki main dur dur rahta hun

tasawwur aap ka har dam meri kanar mein hai

dam aa ke aankhon mein dekhe to rah un ki magar

ghazab ye hai ki taghaful mizaj-e-yar mein hai

shab-e-firaq ka puchho na haal kuchh 'wahbi'

ziyaada hashr ke din se mere shumar mein hai