غم فراق میں چہرہ نڈھال ایسا تھا

غم فراق میں چہرہ نڈھال ایسا تھا

کچھ اس کے سامنے دل کا سوال ایسا تھا

جواب دینے سے قاصر تھے آئنے سارے

وہ ایک چہرہ یہاں بے مثال ایسا تھا

لہو کی آگ میں اتنا تپا کہ ٹوٹ گیا

مرے بدن میں بھی کچھ اشتعال ایسا تھا

ہماری صبح یہاں کتنی شب گزیدہ تھی

طلوع مہر کا ہر پل زوال ایسا تھا

اک انتشار کا موسم ٔہے ساری بستی میں

لہو میں ڈوبا ہوا اب کے سال ایسا تھا

کوئی نہ بات بنی اس کی انجمن میں نظرؔ

فقیہ شہر کا جاہ و جلال ایسا تھا