غم حیات کا یوں بھی کبھی صلہ مل جائے

غم حیات کا یوں بھی کبھی صلہ مل جائے

تلاش آگ کی ٹھہرے مگر خدا مل جائے

عجیب بات ہے جب اس کو بھولنا چاہوں

وہ ذہن و دل کے دریچوں سے جھانکتا مل جائے

مقابلے میں کھڑے ہیں ہزارہا فرعون

خدا کرے کہ مجھے بھی کوئی عصا مل جائے

عمل ہی ہے مرا ایمان زندگی یارو

کھنگالتا ہوں سمندر نہ جانے کیا مل جائے

مجھے بھی آگ کا دریا عبور کرنا ہے

اٹھا دو آنکھ کہ مجھ کو بھی حوصلہ مل جائے

وہ ریگ زار جہاں پر خرد کے پاؤں جلیں

جنوں ہمارا وہاں بھی برہنہ پا مل جائے

ملے گا جا کے سمندر سے فکر کا دریا

چٹانیں کاٹ رہا ہے کہ راستہ مل جائے

اک ایک در پہ صدا دے رہا ہوں اے مہدیؔ

کوئی تو خوابوں کی بستی میں جاگتا مل جائے