gham-e-hayat ka yun bhi kabhi sila mil jae

ġham-e-hayāt kā yuuñ bhī kabhī sila mil jaa.e

talāsh aag kī Thahre magar ḳhudā mil jaa.e

ajiib baat hai jab us ko bhūlnā chāhūñ

vo zehn-o-dil ke darīchoñ se jhāñktā mil jaa.e

muqāble meñ khaḌe haiñ hazār-hā fir.aun

ḳhudā kare ki mujhe bhī koī asā mil jaa.e

amal hī hai mirā īmān-e-zindagī yaaro

khañgāltā huuñ samundar na jaane kyā mil jaa.e

mujhe bhī aag kā dariyā ubuur karnā hai

uThā do aañkh ki mujh ko bhī hausla mil jaa.e

vo reg-zār jahāñ par ḳhirad ke paañv jaleñ

junūñ hamārā vahāñ bhī barahna-pā mil jaa.e

milegā jā ke samundar se fikr kā dariyā

chaTāneñ kaaT rahā hai ki rāsta mil jaa.e

ik-ek dar pe sadā de rahā huuñ ai 'mehdī'

koī to ḳhvāboñ kī bastī meñ jāgtā mil jaa.e

gham-e-hayat ka yun bhi kabhi sila mil jae

talash aag ki Thahre magar KHuda mil jae

ajib baat hai jab us ko bhulna chahun

wo zehn-o-dil ke darichon se jhankta mil jae

muqable mein khaDe hain hazar-ha firaun

KHuda kare ki mujhe bhi koi asa mil jae

amal hi hai mera iman-e-zindagi yaro

khangalta hun samundar na jaane kya mil jae

mujhe bhi aag ka dariya ubur karna hai

uTha do aankh ki mujh ko bhi hausla mil jae

wo reg-zar jahan par KHirad ke panw jalen

junun hamara wahan bhi barahna-pa mil jae

milega ja ke samundar se fikr ka dariya

chaTanen kaT raha hai ki rasta mil jae

ik-ek dar pe sada de raha hun ai 'mehdi'

koi to KHwabon ki basti mein jagta mil jae